BIG BREAKING:ರಶ್ಮಿಕಾ ಪಡೆಯುವ ಸಂಭಾವನೆ ಎಷ್ಟು ಎಂಬುದು ಗೊತ್ತಾದರೆ ಅಚ್ಚರಿ ಗ್ಯಾರಂಟಿ! ಐಟಿ ದಾಳಿಗೂ ಇದಕ್ಕೂ ಇದೆಯಾ ಸಂಬಂಧ- ಕಹಳೆ ನ್ಯೂಸ್
ನಟಿ ರಶ್ಮಿಕಾ ಮಂದಣ್ಣ ಮನೆ ಮೇಲೆ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ದಾಳಿ ಮಾಡಿರುವ ಹಿನ್ನೆಲೆಯಲ್ಲಿ ಅವರ ವಾರ್ಷಿಕ ಆದಾಯ ಎಷ್ಟು ಇರಬಹುದು ಎಂಬ ಪ್ರಶ್ನೆ ಸಹಜವಾಗಿಯೇ ಎಲ್ಲರ ಮನದಲ್ಲೂ ಮೂಡಿದೆ.
ಕೆಲವೇ ವರ್ಷಗಳ ಹಿಂದೆ ಚಿತ್ರರಂಗಕ್ಕೆ ಕಾಲಿಟ್ಟ ಈ ಕೊಡಗಿನ ಬೆಡಗಿ ಯಾವ ಚಿತ್ರಕ್ಕೆ ಎಷ್ಟು ಸಂಭಾವನೆ ಪಡೆದಿದ್ದಾರೆ ಎಂಬುದನ್ನು ತಿಳಿದುಕೊಳ್ಳಬೇಕೆಂಬ ಕುತೂಹಲ ಸಿನಿಪ್ರಿಯರಿಗಿದೆ.
ಅತಿ ಕೆಡಿಮೆ ಸಂಭಾವನೆಯಲ್ಲಿ ಶುರುವಾದ ಸಿನಿಜರ್ನಿ
ಅಚ್ಚರಿ ಎಂದರೆ ಇಂದು ರಶ್ಮಿಕಾ ಮಂದಣ್ಣ ಬಹುಬೇಡಿಕೆಯ ನಟಿಯಾಗಿ ಬೆಳೆದಿದ್ದಾರೆ. ಆದರೆ ಅವರ ಬಣ್ಣದ ಬದುಕಿನ ಪಯಣ ಶುರುವಾಗಿದ್ದು ತುಂಬ ಚಿಕ್ಕ ಮೊತ್ತದ ಸಂಭಾವನೆಯಿಂದ! ಅವರು ನಟಿಸಿದ ಚೊಚ್ಚಲ ಚಿತ್ರ ಕಿರಿಕ್ ಪಾರ್ಟಿ. ರಕ್ಷಿತ್ ಶೆಟ್ಟಿ ಒಡೆತನದ ‘ಪರಮ್ವಾ ಸ್ಟುಡಿಯೋಸ್’ ಮತ್ತು ಪುಷ್ಕರ್ ಮಲ್ಲಿಕಾರ್ಜುನ್ರವರ ‘ಪುಷ್ಕರ್’ ಫಿಲಂಸ್ ಬ್ಯಾನರ್ನಲ್ಲಿ ಆ ಸಿನಿಮಾ ಮೂಡಿಬಂದಿತ್ತು. ಒಂದು ಸಾಧಾರಣ ಬಜೆಟ್ನಲ್ಲಿ ‘ಕಿರಿಕ್ ಪಾರ್ಟಿ’ ತಯಾರಾಗಿತ್ತು. ಆ ಚಿತ್ರಕ್ಕೆ ರಶ್ಮಿಕಾ ಪಡೆದಿದ್ದ ಸಂಭಾವನೆ ಮೊತ್ತ ತುಂಬ ಕಡಿಮೆ ಎಂಬುದು ಮೂಲಗಳ ಮಾಹಿತಿ.
ದಿಢೀರ್ ಹೆಚ್ಚಾಯ್ತು ಡಿಮ್ಯಾಂಡ್
‘ಕಿರಿಕ್ ಪಾರ್ಟಿ’ ಹಿಟ್ ಆಗಿದ್ದೇ ತಡ, ರಶ್ಮಿಕಾ ಖ್ಯಾತಿ ಇಡೀ ದಕ್ಷಿಣ ಭಾರತಕ್ಕೆ ಹರಡಿತು. ಪರಿಣಾಮವಾಗಿ ಅವರ ಸಂಭಾವನೆ ಕೂಡ ಹೆಚ್ಚಾಯಿತು. ಬಳಿಕ ಕನ್ನಡದಲ್ಲಿ ಪುನೀತ್ ರಾಜ್ಕುಮಾರ್ ಜೊತೆ ‘ಅಂಜನಿಪುತ್ರ’ ಹಾಗೂ ಗಣೇಶ್ ಜೊತೆ ‘ಚಮಕ್’ ಸಿನಿಮಾದಲ್ಲಿ ಅಭಿನಯಿಸಿದರು. ನಂತರ ನೇರವಾಗಿ ಟಾಲಿವುಡ್ಗೆ ಎಂಟ್ರಿ ಪಡೆದ ಅವರಿಗೆ ಅಲ್ಲಿನ ನಿರ್ಮಾಪಕರು ಭಾರಿ ಮೊತ್ತವನ್ನೇ ನೀಡಲಾರಂಭಿಸಿದರು. ಚೊಚ್ಚಲ ಚಿತ್ರ ‘ಚಲೋ’ ದೊಡ್ಡಮಟ್ಟದಲ್ಲಿ ಸದ್ದು ಮಾಡದಿದ್ದರೂ, ವಿಜಯ್ ದೇವರಕೊಂಡ ಜೊತೆ ನಟಿಸಿದ ‘ಗೀತಾ ಗೋವಿಂದಂ’ ಸೂಪರ್ ಹಿಟ್ ಆಯಿತು. ನಾನಿ ಮತ್ತು ಅಕ್ಕಿನೇನಿ ನಾಗಾರ್ಜುನ ಜೊತೆ ತೆರೆಹಂಚಿಕೊಂಡ ‘ದೇವದಾಸ್’ ಸಿನಿಮಾ ಕೂಡ ಗಲ್ಲಾಪೆಟ್ಟಿಗೆಯಲ್ಲಿ ಗೆದ್ದು ಬೀಗಿತು. ಆ ವೇಳೆಗಾಗಲೇ ರಶ್ಮಿಕಾ 50 ಲಕ್ಷ ರೂ.ಗಿಂತಲೂ ಅಧಿಕ ಸಂಭಾವನೆ ಪಡೆಯಲು ಆರಂಭಿಸಿದ್ದರು.
‘ಪೊಗರು’ ತಂಡದಿಂದ ಸಿಕ್ಕಿದೆಯಂತೆ 65 ಲಕ್ಷ ರೂ. ಸಂಭಾವನೆ!
ಯಾವ ಮಟ್ಟಕ್ಕೆ ರಶ್ಮಿಕಾ ಡಿಮ್ಯಾಂಡ್ ಹೆಚ್ಚಿದೆ ಎಂದರೆ, ಬಹುತೇಕ ಕನ್ನಡ ಸಿನಿಮಾ ನಿರ್ಮಾಪಕರು ರಶ್ಮಿಕಾ ಕಾಲ್ ಶೀಟ್ ಕೇಳಲು ಸಾಧ್ಯವೇ ಇಲ್ಲ ಎಂಬಂತಾಗಿದೆ. ಸದ್ಯ ಅವರ ನಟನೆಯ ‘ಪೊಗರು’ ಚಿತ್ರ ಬಿಡುಗಡೆಗೆ ಸಿದ್ಧವಾಗುತ್ತಿದೆ. ಈ ಚಿತ್ರಕ್ಕೆ ಧ್ರುವ ಸರ್ಜಾ ನಾಯಕ. ನಂದಕಿಶೋರ್ ನಿರ್ದೇಶನ ಮಾಡುತ್ತಿದ್ದಾರೆ. ಗಾಂಧಿನಗರದ ಮೂಲಗಳ ಪ್ರಕಾರ, ‘ಪೊಗರು’ ಸಿನಿಮಾದಲ್ಲಿ ನಟಿಸಲು ರಶ್ಮಿಕಾ ಬರೋಬ್ಬರಿ 65 ಲಕ್ಷ ರೂ. ಸಂಭಾವನೆ ಪಡೆದಿದ್ದಾರಂತೆ. ಸದ್ಯ ಕನ್ನಡಕ್ಕಿಂತಲೂ ಪರಭಾಷೆಯ ಸಿನಿಮಾಗಳನ್ನೇ ಅವರು ಹೆಚ್ಚಾಗಿ ಒಪ್ಪಿಕೊಳ್ಳುತ್ತಿದ್ದಾರೆ.
ಪರಭಾಷೆಯಲ್ಲಿ ಕೋಟಿ ರೂ. ಪಡೆಯುವ ಕನ್ನಡತಿ
ಕನ್ನಡದಲ್ಲಿ ರಶ್ಮಿಕಾ ಅಭಿನಯಿಸಿದ್ದ ‘ಯಜಮಾನ’ ಯಶಸ್ವಿ ಆಯಿತು. ತೆಲುಗಿನ ಸ್ಟಾರ್ ನಟರ ಜೊತೆ ತೆರೆಹಂಚಿಕೊಳ್ಳುತ್ತಲೇ ದೊಡ್ಡ ಮಟ್ಟದಲ್ಲಿ ಸೌಂಡು ಮಾಡುತ್ತಿರುವ ಅವರ ಖಾತೆಯಲ್ಲಿ ಸೂಪರ್ ಹಿಟ್ ಸಿನಿಮಾಗಳಿವೆ. ಎರಡನೇ ಬಾರಿಗೆ ವಿಜಯ್ ದೇವರಕೊಂಡ ಜೊತೆ ‘ಡಿಯರ್ ಕಾಮ್ರೇಡ್’ ಸಿನಿಮಾದಲ್ಲಿ ನಟಿಸುವ ಅವಕಾಶ ಅವರಿಗೆ ಸಿಕ್ಕಿತು. ಮಹೇಶ್ ಬಾಬು ಜೊತೆಗೆ ‘ಸರಿಲೇರು ನೀಕೆವ್ವರು’ ಚಿತ್ರದಲ್ಲಿ ನಟಿಸಿ ದೊಡ್ಡ ಯಶಸ್ಸು ಸ್ವೀಕರಿಸಿದ್ದಾರೆ. ಪರಿಣಾಮವಾಗಿ ಪ್ರಸ್ತುತ ಅವರ ಸಂಭಾವನೆ ಒಂದು ಕೋಟಿ ರೂ.ಗೆ ಏರಿದೆ ಎನ್ನಲಾಗುತ್ತಿದೆ.
ಬೇರೆ ಮೂಲಗಳಿಂದಲೂ ಬರುತ್ತಿದೆ ಆದಾಯ!
ಸಿನಿಮಾ ಸಂಭಾವನೆಯಿಂದ ಮಾತ್ರವಲ್ಲದೆ, ಬೇರೆ ಮೂಲಗಳಿಂದಲೂ ಅವರ ಕುಟುಂಬಕ್ಕೆ ಆದಾಯ ಬರುತ್ತಿದೆ. ಈಗಾಗಲೇ ತಿಳಿದಿರುವಂತೆ ರಶ್ಮಿಕಾ ತಂದೆ ಕೂಡ ಓರ್ವ ಉದ್ಯಮಿ. ಕೊಡಗಿನ ವಿರಾಜಪೇಟೆಯಲ್ಲಿ ನೆಲೆಸಿರುವ ಅವರು ಸ್ವಂತ ಬ್ಯುಸಿನೆಸ್ನಲ್ಲಿ ತೊಡಗಿಕೊಂಡಿದ್ದಾರೆ. ಈ ಎಲ್ಲ ಮೂಲಗಳಿಂದ ರಶ್ಮಿಕಾ ಕುಟುಂಬಕ್ಕೆ ಆದಾಯ ಬರುತ್ತಿದೆ. ಚಿತ್ರರಂಗಕ್ಕೆ ಕಾಲಿಟ್ಟು ನಾಲ್ಕು ವರ್ಷ ಪೂರೈಸುವುದರೊಳಗೆ ಕೋಟಿ ರೂಪಾಯಿ ಸಂಭಾವನೆ ಪಡೆಯುವಷ್ಟು ಎತ್ತರಕ್ಕೆ ಅವರು ಬೆಳೆದಿದ್ದಾರೆ. ಸಿನಿಮಾ ಮಾತ್ರವಲ್ಲದೆ, ಜಾಹೀರಾತುಗಳಲ್ಲಿ ನಟಿಸುವ ಮೂಲಕವೂ ಅವರು ಹಣ ಸಂಪಾದಿಸುತ್ತಿದ್ದಾರೆ. ಹಲವು ಪ್ರತಿಷ್ಠಿತ ಬ್ರ್ಯಾಂಡ್ಗಳಿಗೆ ರಶ್ಮಿಕಾ ರಾಯಭಾರಿ ಆಗಿದ್ದಾರೆ.
