ಕೃಷಿ ಪ್ರವಾಸದ ಯಶಸ್ಸು: ಕಾಪು ರೈತ ತಂಡಕ್ಕೆ ಶಿರಸಿ-ಧಾರವಾಡ ಅಧ್ಯಯನ ಮತ್ತು ತರಬೇತಿ ಪ್ರವಾಸ-ಕಹಳೆ ನ್ಯೂಸ್
ಕಾಪು: “ಮಣ್ಣಿಗಿಂತ ಮಿಗಿಲಾದ ಬಂಗಾರವಿಲ್ಲ, ಮಣ್ಣಿನಲ್ಲಿ ಕಷ್ಟಪಡುವ ರೈತನ ಸಾಧನೆಗಿಂತ ಮಿಗಿಲಾದ ಸಾಧನೆ ಬೇರೊಂದಿಲ್ಲ. ಎಲ್ಲರಿಗೂ ಆಹಾರ ಮತ್ತು ಆರೋಗ್ಯ ನೀಡುವ ರೈತನಿಗೆ ಆರ್ಥಿಕತೆಯ ಸಮಗ್ರತೆ ಅತ್ಯಂತ ಅಗತ್ಯ” ಎಂದು ಕಾಪು ತಾಲೂಕು ತಾಂತ್ರಿಕ ವ್ಯವಸ್ಥಾಪಕರು ಶ್ರೀಮತಿ ದಿವ್ಯಾ ಅವರು ಹೇಳಿದರು.
ಕೃಷಿ ಕ್ಷೇತ್ರವು ಸಾಗರದಷ್ಟು ಅವಕಾಶಗಳನ್ನು ಹೊಂದಿದ್ದು, ರೈತರಿಗೆ ಕೃಷಿ ಅಧಿಕಾರಿಗಳು, ವಿಜ್ಞಾನಿಗಳು ಮತ್ತು ಸರ್ಕಾರದ ವಿವಿಧ ಯೋಜನೆಗಳ ನೇರ ಸಂಪರ್ಕ ಕಲ್ಪಿಸಬೇಕಾಗಿದೆ. ಈ ಮೂಲಕ ಕೃಷಿಯಲ್ಲಿ ಆಹಾರ, ಆರೋಗ್ಯ ಹಾಗೂ ಆರ್ಥಿಕ ಸಮಗ್ರತೆಯನ್ನು ಸಾಧಿಸಲು ಅಗತ್ಯವಿರುವ ಎಲ್ಲಾ ನೆರವುಗಳನ್ನು ಒದಗಿಸುವುದು ನಮ್ಮ ಕರ್ತವ್ಯ. ಕೃಷಿಯೇತರ ಅಥವಾ ಪ್ರಚಾರದ ಚಟುವಟಿಕೆಗಳು ಕೇವಲ ಮಾಧ್ಯಮಗಳಿಗೆ ಸೀಮಿತವಾಗದೆ, ನೈಜ ಆಸಕ್ತಿ ಮತ್ತು ಶ್ರಮದಿಂದ ಕೆಲಸ ಮಾಡುವ ಪ್ರತಿಯೊಬ್ಬ ರೈತನ ಅಗತ್ಯತೆಗಳನ್ನು ಪೂರೈಸಲು ನಾವೆಲ್ಲರೂ ಒಟ್ಟಾಗಿ ಶ್ರಮಿಸಬೇಕಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಕಾಪು ಕ್ಷೇತ್ರದಿಂದ 50 ಮಂದಿ ರೈತರನ್ನು ಒಳಗೊಂಡ ತಂಡಕ್ಕೆ ಆಯೋಜಿಸಲಾಗಿದ್ದ ಎರಡು ದಿನಗಳ ಶೈಕ್ಷಣಿಕ ಕೃಷಿ ಪ್ರವಾಸ, ಮಾರ್ಗದರ್ಶನ ಹಾಗೂ ಪ್ರಾತ್ಯಕ್ಷಿಕ ಕಾರ್ಯಕ್ರಮದ ನೇತೃತ್ವ ವಹಿಸಿ ಅವರು ಮಾತನಾಡುತ್ತಿದ್ದರು. ಈ ಪ್ರವಾಸದಲ್ಲಿ ರೈತರಿಗೆ ವಿವಿಧ ಸಾಧಕರ ಜಮೀನಿಗೆ ಭೇಟಿ ಹಾಗೂ ಸಮುದ್ರ ಕೃಷಿ ಅಧ್ಯಯನದ ಉತ್ತಮ ಅವಕಾಶ ಕಲ್ಪಿಸಲಾಗಿತ್ತು.
ಪ್ರವಾಸದ ಪ್ರಮುಖ ಮುಖ್ಯಾಂಶಗಳು:
ಪಂಜರ ಮೀನು ಸಾಕಣೆ (ಹೊನ್ನಾವರ): ಹೊನ್ನಾವರ ಸೇತುವೆ ಬಳಿ 25 ಯುವಕರ ಗುಂಪು ನಡೆಸುತ್ತಿರುವ ಪಂಜರ (Cage) ಮೀನು ಕೃಷಿ ಕೇಂದ್ರಕ್ಕೆ ಭೇಟಿ ನೀಡಲಾಯಿತು. ಕೃಷಿ ಸಾಧಕ ಶ್ರೀ ಸಂಜು ಅವರು ಪಂಜರ ಮೀನು ಸಾಕಣೆಯ ಸಮಗ್ರ ಮಾಹಿತಿ, ತಾಂತ್ರಿಕತೆ, ಮೀನಿನ ತಳಿ ಆಯ್ಕೆ ಮತ್ತು ಸಾಕಣೆ ಕುರಿತು ಪ್ರಾತ್ಯಕ್ಷಿಕೆ ಮೂಲಕ ವಿವರಣೆ ನೀಡಿದರು.
ರಾಷ್ಟ್ರ ಪ್ರಶಸ್ತಿ ವಿಜೇತ ಕೃಷಿಕರ ಫಾರ್ಮ್ ಭೇಟಿ (ಕುಮಟಾ): ಕೃಷಿ ಕ್ಷೇತ್ರದಲ್ಲಿ ರಾಷ್ಟ್ರ ಪ್ರಶಸ್ತಿ ಪುರಸ್ಕೃತರಾದ ಕುಮಟಾದ ಶ್ರೀ ಎನ್. ಡಿ. ಹೆಗಡೆ ಅವರ ಫಾರ್ಮ್ ಮತ್ತು ನರ್ಸರಿಗೆ ರೈತರ ತಂಡ ಭೇಟಿ ನೀಡಿತು. ಸುಮಾರು 20,000ಕ್ಕೂ ಹೆಚ್ಚು ಅಡಿಕೆ ಗಿಡಗಳು ಹಾಗೂ ಲಕ್ಷಾಂತರ ರೋಗರಹಿತ ಕಾಳುಮೆಣಸಿನ ಗಿಡಗಳನ್ನು ಸಾವಯವ ಪದ್ಧತಿಯಲ್ಲಿ ಬೆಳೆದು ಲಾಭದಾಯಕ ಕೃಷಿ ಮಾಡುವ ಕುರಿತು ಅವರು ಮಾರ್ಗದರ್ಶನ ನೀಡಿದರು.
ಕೃಷಿ ವಿಜ್ಞಾನ ಕೇಂದ್ರ (ಶಿರಸಿ): ಕೆ.ವಿ.ಕೆ ಶಿರಸಿಯಲ್ಲಿ ರೈತರಿಗೆ ಆಹಾರ ಮತ್ತು ಸಮಗ್ರ ಕೃಷಿ ಪದ್ಧತಿ ಹಾಗೂ ಸರ್ಕಾರಿ ಯೋಜನೆಗಳ ಕುರಿತು ಮಾಹಿತಿ ಒದಗಿಸಲಾಯಿತು.
ವಿಷಯ ತಜ್ಞರಾದ ಡಾ. ವಿಜಯಲಕ್ಷ್ಮಿ ನಾಯ್ಕ್ ಅವರು ಆಹಾರ ಭದ್ರತೆ ಮತ್ತು ಮೌಲ್ಯವರ್ಧನೆ ಕುರಿತು ಮಾಹಿತಿ ನೀಡಿದರು. ಸಹಾಯಕ ಪ್ರಾಧ್ಯಾಪಕರಾದ ಡಾ. ಬಿ. ಸಿ. ಕೊಳಾರ ಅವರು ಸಮಗ್ರ ಕೃಷಿ ಪದ್ಧತಿಗಳ ಕುರಿತು ರೈತರಿಗೆ ತರಬೇತಿ ನೀಡಿದರು. ಶ್ರೀ ದಾನೇಶ್ವರಿ ಫಾರ್ಮ್ ಹೌಸ್ (ಮೊರಬ): ಮೊರಬದ ಶ್ರೀ ಗಂಗಪ್ಪ ಕಲವಾಡ ಅವರ ಫಾರ್ಮ್ಗೆ ಭೇಟಿ ನೀಡಿ, ಅಲ್ಲಿ ಅವರು ನಿರ್ವಹಿಸುತ್ತಿರುವ 600 ಕುರಿ ಹಾಗೂ ಆಡುಗಳು, ಹೈನುಗಾರಿಕೆ ಮತ್ತು ಕೋಳಿ ಸಾಕಾಣಿಕೆಯ ಯಶಸ್ವಿ ಮಾದರಿಗಳನ್ನು ವೀಕ್ಷಿಸಿ ಪ್ರಾಯೋಗಿಕ ಮಾಹಿತಿ ಪಡೆದುಕೊಂಡರು.
ಧಾರವಾಡ ಕೃಷಿ ಮೇಳ-2026: ಪ್ರವಾಸದ ಕೊನೆಯ ಭಾಗವಾಗಿ ರೈತರೆಲ್ಲರೂ ‘ಧಾರವಾಡ ಕೃಷಿ ಮೇಳ-2026’ರಲ್ಲಿ ಭಾಗವಹಿಸಿ, ನೂತನ ಕೃಷಿ ಯಂತ್ರೋಪಕರಣಗಳು ಮತ್ತು ತಂತ್ರಜ್ಞಾನಗಳ ಪ್ರತ್ಯಕ್ಷ ಅನುಭವ ಪಡೆದುಕೊಂಡರು.
ಶಾಸಕರು ಹಾಗೂ ರೈತರಿಂದ ಅಭಿನಂದನೆ:
ರೈತರಿಗೆ ಅತ್ಯಂತ ಉಪಯುಕ್ತ ಹಾಗೂ ಮಾಹಿತಿಪೂರ್ಣ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ಸಂಘಟಿಸಿದ ತಾಂತ್ರಿಕ ಅಧಿಕಾರಿ ಶ್ರೀಮತಿ ದಿವ್ಯಾ ಅವರನ್ನು ಪ್ರವಾಸದಲ್ಲಿ ಭಾಗವಹಿಸಿದ ಎಲ್ಲಾ ರೈತರು ಹೃತ್ಪೂರ್ವಕವಾಗಿ ಅಭಿನಂದಿಸಿದರು. ಕ್ಷೇತ್ರದ ರೈತರ ಹಿತದೃಷ್ಟಿಯಿಂದ ನಿರಂತರವಾಗಿ ಶ್ರಮಿಸುತ್ತಿರುವ ರೈತ ಸಂಪರ್ಕ ಕೇಂದ್ರದ ಅಧಿಕಾರಿಗಳ ಕಾರ್ಯವೈಖರಿಯನ್ನು ಕಾಪು ಕ್ಷೇತ್ರದ ಶಾಸಕರಾದ ಶ್ರೀ ಗುರ್ಮೆ ಸುರೇಶ್ ಶೆಟ್ಟಿ ಅವರು ಮುಕ್ತಕಂಠದಿಂದ ಶ್ಲಾಘಿಸಿದರು. “ರೈತರ ಪ್ರತಿಯೊಂದು ಕೃಷಿ ಸಂಬಂಧಿತ ಅಗತ್ಯತೆಗಳಿಗೆ ಮತ್ತು ಅಭಿವೃದ್ಧಿ ಕಾರ್ಯಗಳಿಗೆ ತಮ್ಮ ಸಂಪೂರ್ಣ ಬೆಂಬಲ ಸದಾ ಇರಲಿದೆ” ಎಂದು ಶಾಸಕರು ಭರವಸೆ ನೀಡಿದರು.
