ಹಮಾದ್ ಮೆಡಿಕಲ್ ಕಾರ್ಪೊರೇಷನ್ (ಎಚ್ಎಂಸಿ) ಬ್ಲಡ್ ಬ್ಯಾಂಕ್ ಕತಾರ್ ನ ಸಹಯೋಗದೊಂದಿಗೆ ಗಲ್ಫಾರ್ ಟೋಸ್ಟ್ ಮಾಸ್ಟರ್ಸ್ ಕ್ಲಬ್ (ಜಿಟಿಎಂ) ಇತ್ತೀಚೆಗೆ ಎಚ್ಎಂಸಿ ರಕ್ತದಾನಿ ಘಟಕದಲ್ಲಿ ರಕ್ತದಾನ ಅಭಿಯಾನವನ್ನು ನಡೆಸಿತು.
ಜಿಟಿಎಂ, ಕತಾರ್ನ ಪ್ರಮುಖ ತಾಂತ್ರಿಕ ಮತ್ತು ನಿರ್ಮಾಣ ಸಂಸ್ಥೆಯಾದ ಗಲ್ಫಾರ್ ಅಲ್ ಮಿಸ್ನಾಡ್ನ ಕಾರ್ಪೊರೇಟ್ ಟೋಸ್ಟ್ ಮಾಸ್ಟರ್ಸ್ ಕ್ಲಬ್ ಆಗಿದೆ. ಅದರ ಸದಸ್ಯರು ಮತ್ತು ಸಾರ್ವಜನಿಕರಲ್ಲಿ ಜಾಗ್ರತಿ ಮೂಡಿಸಿ , ಅಮೂಲ್ಯವಾದ ರಕ್ತವನ್ನು ದಾನ ಮಾಡಲು ಉತ್ತೇಜಿಸುವುದು ಈ ಕಾರ್ಯಕ್ರಮದ ಮುಖ್ಯ ಉದ್ದೇಶವಾಗಿತ್ತು. ಈ ಪ್ರಕ್ರಿಯೆಯಲ್ಲಿ ಕೋವಿಡ್ ನಿಯಮಾವಳಿಗಳನ್ನು ಕಟ್ಟುನಿಟ್ಟಾಗಿ ನಿರ್ವಹಿಸಲು ರಕ್ತದಾನವನ್ನು ನಾಲ್ಕು ಗಂಟೆಗಳ ಕಾಲ ವಿಸ್ತರಿಸಲಾಗಿತ್ತು. ಗಲ್ಫಾರ್ ಅಲ್ ಮಿಸ್ನಾಡ್ ಅವರ ಹಿರಿಯ ಆಡಳಿತ ಅಧಿಕಾರಿಗಳು ತಾವೇ ಮುಂಚೂಣಿಯಯಲ್ಲಿ ನಿಂತು ರಕ್ತವನ್ನು ದಾನ ಮಾಡಿ ಉಳಿದ ಸಹಪಾಠಿಗಳಿಗೆ ಸ್ಫೂರ್ತಿ ನೀಡಿದರು. ಹೆಚ್ಚಿನ ಸಂಖ್ಯೆಯಲ್ಲಿ ಜನರು ತಮ್ಮ ರಕ್ತವನ್ನು ಎಚ್ಎಂಸಿ ಬ್ಲಡ್ ಬ್ಯಾಂಕ್ಗೆ ನೀಡಿದ್ದಾರೆ. ಗಲ್ಫಾರ್ ಅಲ್ ಮಿಸ್ನಾಡ್ ನ ಸತತ ಸಮಾಜಮುಖಿ ಮಾನವೀಯ ಪಾತ್ರವನ್ನು ಎಚ್ಎಂಸಿ ಸದಾ ಗುರುತಿಸಿ ಪ್ರಶಂಸಿಸಿದೆ.
“ನಮ್ಮ ಸಹೋದ್ಯೋಗಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಮತ್ತು ಉದಾತ್ತ ಉದ್ದೇಶಕ್ಕಾಗಿ ರಕ್ತದಾನ ಮಾಡಲು ಸ್ವಯಂಪ್ರೇರಣೆಯಿಂದ ಮುಂದೆ ಬಂದಿರುವುದು ಹೃದಯಸ್ಪರ್ಶಿಯಾಗಿತ್ತು. ಇಂತಹ ಕಾರ್ಯಕ್ರಮಗಳನ್ನು ಪ್ರಾರಂಭಿಸಲು ಮತ್ತು ತಮ್ಮ ಪ್ರೀತಿಪಾತ್ರರ ಪ್ರಾಣ ಉಳಿಸಲು ಹೆಣಗಾಡುತ್ತಿರುವವರಿಗೆ ಸಹಾಯ ಮಾಡಲು ಇದು ನಮ್ಮನ್ನು ಪ್ರೇರೇಪಿಸುತ್ತದೆ ”ಎಂದು ಜಿಟಿಎಂ 2020-21 ಅಧ್ಯಕ್ಷ, ನಚ್ಚಿನ ಕನ್ನಡಿಗ, ಸುಬ್ರಹ್ಮಣ್ಯ ಹೆಬ್ಬಾಗಿಲು ಅವರು ತಿಳಿಸಿದರು. ಜಿಟಿಎಂ 2012 ರಿಂದ ಕತಾರ್ನಲ್ಲಿ ಸಾಮಾಜಿಕ ಕಲ್ಯಾಣ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಭಾಗವಹಿಸುತ್ತಿದೆ. ಸಮುದ್ರ ಕಿನಾರೆ ಸ್ವಚ್ಚೀಕರಣ, ವನಮಹೋತ್ಸವ, ಪರಿಸರ ಸಂರಕ್ಷಣೆ, ಯುವ ನಾಯಕತ್ವ ಬೆಳವಣಿಗೆ, ಕಲಾ ಸ್ಪರ್ಧೆಗಳು ಮತ್ತು ಕುಟುಂಬಗಳಿಗೆ ಸಂಬಂಧಿಸಿದ ಚಟುವಟಿಕೆಗಳನ್ನು ಅಚ್ಚುಕಟ್ಟಾಗಿ ಮಾಡುತ್ತಾ ಬಂದಿದೆ.
